وبلىس ورتالىعىندا اشىلعان جاڭا كوپىر ۇزىندىعى 87, ەنى 4 مەتردى قۇرايدى.
قۋاتى 60 توننا جۇك الىپ وتۋگە جەتەدى. كوپىردىڭ قۇرىلىسىن «قازاۆتوجول» اق جەرگىلىكتى بولىمشەسى, «پاۆلودار وزەن پورتى» اق جانە «ستالمونتاج» جشس ءتورت ايدىڭ ىشىندە ءبىتىردى.
كوپىردىڭ اشىلۋىنا وبلىس اكىمى بولات باقاۋوۆ تا قاتىستى. اكىمدىكتىڭ حابارىنشا, قۇرىلىس بيۋدجەتتەن تىس قارجىنىڭ ەسەبىنەن جۇرگىزىلدى. قۇرىلىسشىلاردىڭ ايتۋىنشا, ولار 28 باعانانى وزەن ارناسىنا قاداپ, ولاردىڭ ۇستىنەن سالىنعان تەمىر بەلدەۋلەر مەن قورشاۋلارمەن بەكىتىپتى.
ەندى پاۆلودارلىقتار مەن قالا قوناقتارى كوپىر ارقىلى ۋسولكا وزەنىنىڭ ارعى جاعالاۋىنا وتە الادى. وبلىستىق اكىمدىكتىڭ حابارىنا قاراعاندا, الداعى جىلدارى بۇل جەردە بياتلون جانە ترياتلونعا ارنالعان ورىندار جاسالادى. وزەن الابىنداعى 15 گەكتار جەردە ەتنواۋىل سالىنادى.
فاريدا بىقاي, «ەگەمەن قازاقستان»
پاۆلودار